“Fidju, pamodi bu mandan pa un asilu?”
“Mama, bu staba na kadera di rodas, n´ten txeu kusas di fazi, ka ta daba pan kuida di bo.”
“Engrasadu nha fidju, kantu bu nasci, bu ka ta andaba i n´ta karregaba bo na kolu, n´tinha txeu kusas di fazi, tuma konta di bus irmons, fazê kafé, almusu, janta, laba ropa, i tantus otus kusas maz… n´tinha txeu kusas di fazi, n´ta kuidaba di bu pai, i di tudu dentu di kasa…
Dipos kantu bu komesa ta anda kuidadu ku bo aumenta, n´tinha k djobi na kada kantu di kasa, pa odja kusé bu staba ta fazi.
Dipos txiga kel fasi di scola, n´ta lebaba bo i n´ta torna ba tomaba bo, i la na kasa n tinha txeu kusas di fazi…
N pobu na scola partikular, n´ta lababa ropas na kasa di alguen pan podia pagabu kel midjor scola pa bu studa… sempre ta pensa na midjor pa bo.
E kantu txiga tempu di ba universidadi…
Lembra, alen di ropas, n´ta fazeba pastel pan bende, pamodi universidadi era karu, n´ta trabadjaba kansadu, pa bu podia ser alguen na vida, ten um diploma, kusa k nunka n tivi, mas kela ka tran nha honra.
Pensao di bu pai era poku, i n´ta fazeba tres trabadju, pa bu prupina na universidadi ka atrasa.
Dipos bu forma, bu casa, bu sai di nos kasa i quasi bu ka ta binha visitan…
N´doecê, n´fika na kadera di rodas, realmenti fika dificil di movimenta na kasa.. i bu soluson foi keli, pon na un asilu di odisus. Undi quasi ninguen ka ta ben djoben, nem mesmu pa pokus minutus pa nu papia. si k ê vida nha fidju… mas txeu kusas inda bu ta ben aprendi…
Só n´ta pidi Deus k bus fidjus, na bu bedjici, kuida di bo, k és ka lebau pa és lugar di abandonu, pa nenhun asilu, pa bu ka sofri di solidao…
Bai nha fidju, k Deus protegebu… tudu dia i noti n´ta ora pa bo… N´ka sabê quandu bu ta torna ben djoben, mas da nhas netos un beju…
Bai nha fidju, k Deus dabu tudo di midjor… pamodi ê Deus k dan forsas na kes horas di cansera, i hora k n´ta ora El ta daba mi forsas… i te hoji ê kuel k n´ta papia…
Pa mi el ê ka só un Deus… hoji El ê nha uniku amigu. Por isso, nha fidju, si bu odja un kadera di roda vaziu pertu di kama, ê la k Deus ta xinta pa papia ku mi, horas… i horas, ta confortan. aliás, sempri El confortan. Sempri.”
Bu mae, pai õ algun familiar sta na un lar di idosu pamodi bu ka ten tempu di kuida del?
